Psalms 115

Nzambi, niandi kaka vuidi nkembo

1Bika kuidi beto, a Yave, bika kuidi beto ;
vayi kuidi dizina diaku kuba nkembo,
mu diambu di luzolo luaku ayi kikhuikizi kiaku.
2Bila mbi makanda malembo tubila ti :
“Kuevi kuidi Nzambi awu e ?”
3Nzambi eto widi ku Diyilu,
niandi weti vanga moso katidi.
4Vayi bitumba biawu bidi palata ayi nolo ;
bivangulu mu mioko mi batu.
5Bibeki miunu vayi bilendi yoluka ko ;
meso vayi bilendi mona ko.
6Bibeki matu vayi bilendi wa ko ;
mayilu vayi bilendi wa tsudi ko.
7Bibeki mioko vayi bilendi simba ko,
malu vayi bilendi diata ko.
Voti bilendi totula ko biyoko mu phovi-yi-dilaka diawu.
8Batu bobo bavanga biawu bela ba banga biawu,
ayi buawu bobo buela bela batu boso bobo bantulanga diana mu biawu.
9A nzo yi Iseli, tula diana mu Yave.
Niandi nsadisi awu ayi nkaku awu.
10A Nzo yi Aloni, tula diana mu Yave.
Niandi nsadisi awu ayi nkaku awu.
11Beno lueti kunkinzika, lutula diana mu Yave.
Niandi nsadisi awu ayi nkaku awu.
12Yave weti kututebukila moyo ayi wela kutusakumuna.
Wela sakumuna nzo yi Iseli,
wela sakumuna nzo yi Aloni.
13Wela sakumuna bobo beti kinzika Yave,
batu baphamba va kimosi ayi batu banneni.
14Bika Yave kaluwokisa,
beno ayi bana beno va kimosi.
15Bika Yave kalusakuna,
mvangi wu diyilu ayi ntoto.
16Yave niandi vuidi Diyilu dizangama
vayi ntoto wuvanu kuidi mutu.
17Kadi sia ti bafua bawu beti zitisa Yave ;
bobo bankuendanga ku tsi yidi dio sui.
18Vayi beto tueti yayisa Yave
tona buabu nate mu zithangu zioso.
Luzitisa Yave.